મૌલા મુંજા હી કેડો થઇ વ્યો કેર
વારેં કેર અસાં સે હી વે જનમ જા વેર
મૌલા મુંજા હી કેડો થઇ વ્યો કેર
વારેં કેર અસાં સે હી વે જનમ જા વેર
મૌલા મુંજા હી કેડો થઇ વ્યો કેર
સજ ઉગી ને સઉં થયો તે
તડે ઉડી વઈ મુલકતા તોજી મહેર
પળવાર મેં પૈવૈયું પોકારું
માતમ મચી વ્યા ચોફેર
મૌલા મુંજા હી કેડો થઇ વ્યો કેર
ભુજ અંજાર ને ભચાઉ ડસો આઈ
છણીપયા ઉ છૂગેર
વાગડ ત સાવ વગડો થઇ વ્યો
સુન લગી આયે ચોફેર
મૌલા મુંજા હી કેડો થઇ વ્યો કેર
નત નૈયું મઠાઈયુ ભણે જત
ઉતે પ્યા અઈયે પાયણે જ ઢેર
હલે જા પણ હંધ ન વે
ઉત સુના થઇ વ્યા ઉ શેર
મૌલા મુંજા હી કેડો થઇ વ્યો કેર
હિન્ધુ મુસલમાન જી હકડીજ અંતિમ વિધિ
અનમે અચે ન જરા ફેર
નાત જત જા વાડા કડા વ્યા
તું સગી નઝર સે નેર
મૌલા મુંજા હી કેડો થઇ વ્યો કેર
રજવાડા પણ અચી વ્યા રોડ તે
કઈક કરોડ પતિ કુબેર
મંગ્ધે ઉ પણ સખી વ્યા
જોકો ક્યોં તે લીલા લેર
મૌલા મુંજા હી કેડો થઇ વ્યો કેર
કર કરમ અસાંજે કચ્છ મથે
ડે ખુસીયું ને ખેર
” મહંમદ ” ચે તો અયે મુંજા મૌલા
તું કજે મની તે મેર
મૌલા મુંજા હી કેડો થઇ વ્યો કેર..
Reference: http://nai-aash.in/2011/11/20/kedo-thai-vyo-ker/