Kutchi Maadu Rotating Header Image

Posts under ‘General’

माडु मॉभत वारा

कच्छडो मुंजो कामणगारो कच्छ कलाधर धाम आय
त्रे मेर मेरामणजी मस्ती चॉथे रण विश्राम आय
माडु हडांजा मॉभतवारा धलमें ईनिजे राम आय
लखलाखेणो अतित असांजो सोनडे मढेली साम आय
हाजीपीर पच्छमतो नॅरे मथे दत् जो ठाम आय
आसापुरा करेती मांडी सजदोने प्रणाम आय
दोस्त दिलबर दगो न करीयें , दिलमे प्रेमजो जाम आय
कच्छ वारा अैं कच्छ में अचॉ धंधा हॅडा बेफाम आय
सॉनजी संघर से बंधेलो धिल हेडा गुलाम आय
मॉज में हर कॉम वसॅती ही सभर जो ईनाम आय
अन्न कपडें अैं दुःखी न थींधा चॅ गुरू घनस्याम आय
: कवि जगदीस गोर

कच्छी माडु साईट के ब वरे

कीं अयॉ
अज कच्छी माडु साईट के ब वरे थ्या. असीं मिणीं वाचकें जो घणें आभार मनयूंता. पांजा कच्छी कवि जेंजे कच्छ प्रेम जो कीं जवाबज नाय अनींजो बॉरो बॉरो आभार. कच्छी माडुते कच्छी माडुयेंजो कच्छी भासा, कच्छी संस्कृति ने कच्छ वतन साथेजो संबध अना मजबुत थीयॅ हीज असांजा प्रयत्न अईं.

आभार
जय
कच्छी माडु टीम

મન તુ કોલા ખણેતો ભાર…….

મન તુ કોલા ખણેતો ભાર.(૨)
પોય તુ ખણી ન સકને તાર, મન મુજા તુ ખણી ન સકને તાર. મન તુ……
હેન કાયા જો ઠેઠડો ગડો ને મથા વેજેતો તુ ભાર. (૨)
ગરો ગડો ને ઘાચ્યુ શેલ્યુ, વડા-વડા ઓકાર. મન તુ……….

પન્ધ ઓખોને વાટ અજાણી મથા રુડી પોન્ધી રાત (૨)
જોતુ દઇ-દઇ જોડ્ધો કી ન, જોરને સે તુ ધાર. મન તુ…………

છડ માયા ને કુડ કપટ હી મનડે કે તુ વાર. (૨)
ઠલો વેને ત ઠેકી સગને, ઓકરી થીને પાર. મન તુ……..

હેન જન્ગલ જી ઝાડીયુ ઘાટી ને વસમી લગધી વાટ (૨)
વાઘ વરુ તોકે ફેરી અચીન્ધા, કરીન્ધા તોજા હાલ. મન તુ…………….

બાળપણ તુ ખેલ મે ખોયો મથ જુવાની જો જોર. (૨)
વડો થીઅને તેર હડ ન હલધા, તેર થીન્ધા તોજા હાલ. મન તુ…………………

ખેન્ધા તેસીયે તુ ખાસો લગને સે તુ નિષ્ટ્ ધાર. (૨)
થકને તેર કોય ઓડો ન થીન્ધો, સમજી વેન તુ જાર. મન તુ…………….

પ્રભુ દેને સે પ્રભુ કે ડઇ ડે તોજો નાય તલભાર. (૨)
મન મોન્જેલો તન તોટેલો, હેનકે તુ સમજાય. મન તુ….

મુજો મુજો હુઇ કરીયે તો તોજો નાય પઇભાર. (૨)
મન સમજ્યો પણ મગજ મોજ્યો, ધોડી વઈ ધરબાર. મન તુ…………….

તેડો અચિન્ધો મથે વારેજો ત લેકુ કરધો જીવરાજ.(૨)
લેકુ ન તોજીયુ કમ અચીન્ધ્યુ, થિણુ પોન્ધો તયાર. મન તુ………

ચાર જણા તોકે ખભે ખણીને છડે અચીન્ધા ઘરબાર. (૨)
છડે અચીન્ધા તોકે વન મે હેકડો, ઘરે અચી કરધા રાળ. મન તુ……………..

રુએતા પેન્ઢજે સુખ સ્વારથ લા તોજી નાય જરુઆત.(૨)
માડુ બાયુ ભેગા થઈ ને, ડીએતા ધલધાર. મન તુ…….

લેખો ગેનધા રાઈ રાઈ જા તેર ન અચિન્ધી ગાલ. (૨)
ગાલ કરનેજો આડી અવળી, મથાનુ પોન્ધી માર. મન તુ…………….

આગળ વેને ત કન્ઢા ને કકરા કુન્ઢ ભર્યા અઈ ચાર. (૨)
નરક કુન્ઢ મે ડુબસઃઇ દઈ ને, ખણી ન સકને તાર. મન તુ……………..

સચ્ચી શિખામણ સન્ત પુરુષ જી હૈયે મે તુ ધાર.(૨)
ઓધવરમજી હેટલી અરજી, મનમે કરતુ વિચાર.
મન તુ હણે ખણી ગેન ભાર, ને તુ ઓકરી થીને પાર

~~~~~~~~~~***~~~~~~~~~~

: ધ્રુવ એલ. ભાનુશાલી – “ધ્રુવ”

પાંજો મેઠડો વતન

ઝાડ કડેક હી પણ ચોંધો !
“મુકે પહેલાં ચાય-પાણી ડ્યો,
પોય જ આંકે છાંઈ ડીંધો”

કોયલ કડેક હી પણ ચે !
“કોય સારી જગા ડેસીને મુકે ફ્લેટ બંધી ડ્યો.
પોય ગાતે જી મજા અચે”

થોડાક પૈસા જેજા મેલે ત,
નદી પણ પેંઢજો મેળે પાણી
સામે કાઠે તે ઠલાય વેજે ત નવાઈ નાય.

“ધ્રુવ”ચે હલ મુંજા મન ! પાં પાંજે મેઠડે વતન હલું.
જેતે સુરજ કે તડકે લા કોઇ લાલચ ન ડીનીં પે.

: ધ્રુવ એલ. ભાનુશાલી – “ધ્રુવ”

कच्छी साहित्य संग्रह

कच्छी भासा भारत देसजी जोनीं भासाऐं मिंजा आए अने कच्छी साहित्य प घणें सदीयें थी विकसीत थिंधो र्यो आए. कच्छी साहित्य मे रूची रखधल कच्छी माडूयेंला करे अन मिंजा थोडा काव्य संग्रह, नवल कथा अने वार्ता जी जाणकारी नीचे लखांतो :
कच्छी साहित्य संग्रह
Kutchi Literature Books

 

लेखक Author चॉपडी जो नालो Title विषय Book Subject
Madhav Joshi “Ashq” Sambhare Muke Sen Poetry
Kavi Tej Virandh Poetry
Kavi Tej Pakhiyan Jiya Piroliyu Essay 
Dr. Vishanji Nagda Sao Essay 
Dr. Vishanji Nagda Mee Child Song 
Vraj Gaj Kandh Mandhiyani Poetry
Nenshi Bhanushali “Jaani” Bherpo Poetry
Nenshi Bhanushali “Jaani” Bhataar Poetry
Ravi Pethani Vatar Poetry 
Ravi Pethani Shikshapatri Translation 
Mulshankar Joshi Akhi Me Sonu Poetry
Gautam Joshi Man Moti Ja Mania Part-2 Novel  
Haresh Darji Zarukho Short Story  
Narayan Joshi “Karayal” Karayal Katchhi Pathavali Linguistic  
Lalji Mevada Sabab Sonji Khan Linguistic  
Madankumar Anjaria “Kwab” Aariso Criticism  
Ramji J. Joshi Kagar Karayal Je Nan Letter literature   
Jayesh Bhanushali Ujako Poetry

शुभ नवरात्री २०१० !

श्री नीतीजा दोहरा

पेला नमज नीम सें , जिको मिणीजो मूर;
तेंसें तेंजें तेज सें , निकरी वेंधा सूर. : १

मा पेके अईं मान डयॉ, अईं आंजा आधार ;
अिनींजी आसीससेंज, अईं तरी थींधा पार. : २

मेहताजी के मान डॅ, भणतर में मन भेड़ ;
प्यारो थीजे प्रेम सें, रखॉ मिणीअसें मेड़. : ३

वडे वताई वाट तें, समजी हलजा सॅज़ ;
चॅ नारायण नीमसें, नित अुनींअ वट वॅज. : ४

सुखसें वॅलो रॅ सुमीं, वॅलो अुथीये वीर ;
बर बुद्धि नें धन वधे, सुखमें रॅ सरीर. : ५

गूरुके ईश्वर सम गणें, भणतर में मन भेड़ ;
विध्या सें वृध्घि थीये, विध्या जॅडो़ केर . : ६

विगर सवारथ वडेंजी, सेवा कर तूं सॅज़ ;
नारायण चॅ नीम सें, वधू अुनींअ वट वॅज़ . : ७

: ठक्कर नारायणजी विसनजी जोबनपुत्र

ईस्वर स्तुति

ईस्वरके भज प्रॅम सें, आय जग़जो आधार;
गुण तेंजा संभारीयों, सुखी कंधल संसार – १

कर रक्षम प्रभु हेत सें , धिल-ज असांजो साफ;
भोल असीं करीयों कडें, से हरी कर तं माफ – २

श्री कच्छी लिपि लिखणसें , कच्छीअेंजो कल्याण ;
पोथी तें कारण लिखां, लिपिके डीजा मान – ३

: ठक्कर नारायणजी तुलसीदास जोबनपुत्र

वखत डिसीं ….

वखत डिसीं वॅवार ‘जानी’ ,
जगत मथे सउ कजा
वा वरंधे वरे विठी,
जीं मिंधर मथे धजा .
: कवि नेणसीं भानुसाली “जानी”
Vakhat desin veyvar ‘jaani’

(more…)

भा : बाल काव्य

वीर पसली अने रक्षा बंधन जे डीं ही सुंदर कविता .
**भा**
*बाल काव्य*
मुजे मिठड़े भा के झूलायां !
लै भेंनर !
लाडले वीरके झूलायां !…
झूले झूले तो वीर आमेंजी डार ते !
लॅरें लॅरें नीर सरोवर पार ते!
अमरत फल खारायां , लै भेंनर !
नीर ने खीर पिरायां , लै भेंनर !… लाडले
रांध रमे तो वीरो , लिक्क बुचाणी !
नित नित सुणे तो इ , नैं नैं आखाणी !
रुसे त आउं परचायां , लै भेंनर !
हुलसां ने हुलसांयां , लै भेंनर !.. लाडले
प्यारे वतन जो भा, संतरी थींधो !
मा पे ने भेंनर जा , कोड पुरींधो !
लाखेणी लाडी पेंणायां, लै भेंनर !
मिठडा़ गीत पै गायां , लै भेंनर!.. लाडले
: माधव जोशी “अश्क”