वसंतराणी…
वसंतराणी….
नवले सोरॅं सणगारें महेकंधे आवई वसंतराणी
फुलडेंजा जांजर छमछमंधे आवई वसंतराणी
कोयलडीयूं कुणकारीएं, मोरलां आवकारीएं
पखीयेंजा स्वागत वधाइंधे आवई वसंतराणी
कवली कुंपर लचॅंत्यूं नें नचॅं लागणी डारें
खिसकोलीएं भॅरी रमंधे आवई वसंतराणी
नंयारङ, नंयाउमंग नें नंयेतरङे सोभेती धरा
प्रकृतिजी जुआणाई खीलाइंधे आवई वसंतराणी
केसूडे जा कामण सिज઼ सोन छाबें तां हींचें
वासंती वावरा चूमींधे आवई वसंतराणी
‘मन’ पिरीं मिलणें हेज तां हींयें हिलोरेंतो
कसधार बखुं भरींधे आवई वसंतराणी
मनीषा अजय वीरा ‘मन’🌹
कडॅक अचींजा
कडॅक अचींजा
*~~~~~~~~*
*~~~~~~~~*
प्रेमसे नोतरो जली ,कडॅक अचींजा
हूंभसे नोतरो जली, कडॅक अचींजा
वरे सजो रखातो, जाध करीजा
चांतो सामे हली, कडॅक अचींजा
बाना हलधा न कीं,मूधत डियूं वडी
मन करे ज भली, कडॅक अचींजा
भो भो ने भले भले, कडॅ म कईजा
कढो म गाल खिली, कडॅक अचींजा
भरी रखीयूं जाधूं, कांत केनीरीयूं
बारा कढीबो मिली, कडॅक अचींजा
*कांतिलाल कुंवरजी सावला कांत तुमडी*
नाय थका
*नाय थका..*
पग थका.. घुडा थका.
मंजिल ते पोजे जा थडकार
नाय थका..
भले बायपास वे के एन्जियोग्राफी ..
जिंदगी माणे जा धबकार
नाय थका..
भले रमुंता हेवर ओनलाईन ते..
पण चलक चलाणी रमे जा
ओरता नाय थका..
भले हॅवर मलुंता फेस बुक जे फरिये ने वोटस अप जे अंगण मे
पण बईयार फेस टु फेस मलेजा अरमान नाय थका..
मतलबी धोनिया मे कोय कोय जो नाय..
पण मतलब वगर याद कईंधल धोस्तार नाय थका
-विनोद
कच्छी चॉवक : धाबा सॅन करेजी सग़ती वॅ से हॉरी रमॅ
कच्छी चॉवक- ४६ 👍
धाबा सॅन करेजी सग़ती वॅ से हॉरी रमॅ.
माईक्रोफिक्सन
———————-
नॅर ईशा, हीं धिरजी वेनीयें
त स्केटिंग न सिखाबो.तॉजी
जॅडल आकांक्षा के नॅर,सिखॅती
छणॅती,उभी थीयॅती, नीरा
चकामा ने ढीमणा पेंता, हथ
पग छोलजेंता,तांय स्केटिंग
सिखॅजी जिधके छडे नती.
सरीरतें घा पोंधा सेधवाईयें
सें सोंजा थिई वेंधा. छणधो,
उठींधो ने धोड़धो,ऊजसिखी
सगंधो. सरीरतें धाग पोंधा से त मटी वेंधा, ई तूं सॅन न
करी सगॅं त सवारेनूं क्लास
– में म अचीज. आकांक्षा
जॅडी हींमत रखनीयें त तॉके
कोय अटकाई न सगंधो.
अज काउन्चर तानूं तोजी
फी पाछी मिलंधी. सॉरी
ईशा ! तॉकेज निकी करेजो
आय क स्केटिंग सिखॅजी
जिध तॉमें कितरी आय ?
ब्ये डीं नों वरॅजी ईशा टाईट
फीट स्केटिंग ड्रेस ने बूट साथे
कलासजे हॉलमें उगेजे छ
वगेंमें हाजर वी.
अठ मेणे पोय
अज स्केटिंग शो जे फिनालेमें ईशाके रजत मॅडल
मुख्य मंत्री गलेमें पेरायांते
तॅर इनजा सर मिणीया
वधू खुस हूआ.
: भानुबेन
