Kutchi Maadu Rotating Header Image

Posts under ‘Kutchi Kavita,Chovak,Sahitya (Poetry, Quotes, Literature)’

प्लास्टिक

Aug 28th, 2013
by Jay जय.
No comments yet
जबले में दूध मिले, जबले में चाय..
जबले में घारु मिले, जबले में छाय..
जबले में साकभाजी, जबले में गांठीया..
जबले में ‘रोटी’ मिले, भेरा चटणीने भजीया..
रंज को आड़े नतो, खें अॅठ भेरा जभला..
पोय रिबाई मरें, पांजा जीव अबोला..
हटमें प्लास्टिक, प्लास्टिक होटल में…
पाणीजी पाऊच मिलें, पाणी मिले बोटल में..
वेफर प्लास्टिक में, प्लास्टिकमें बिसकीट..
भजर-चुन भेरा, गुटकेला ई ज प्लास्टिक..
निसाणमें प्लास्टिक, मिंधर में प्लास्टिक..
बगीचे में प्लास्टिक, जाडी-जांखरे में प्लास्टिक..
घरमें प्लास्टिक, घर बारां प्लास्टिक
जित डिसॉ- जडें डिसॉ, प्लास्टिक – प्लास्टिक..
हाव-भाव प्लास्टिकजा, प्लास्टिकजी वाणीं..
खिल खोटी प्लास्टिकजी, ‘दास’ माडु कंईयें जाणीं…
: पी. जी. सोनी ‘दास’

अय मींयड़ा !

Jul 24th, 2013
by sachin.
No comments yet
अय मींयड़ा !
वले वतनतें,
आया वठेजा डीं मूंजा मिठड़ा !
वस, हाणें तुं वस अय मींयड़ा ! … वले वतनतें..
पखी पारेवडा आस करीने ,
वनमें विठा अइं , तुं डिस मींयड़ा ! … वले वतनतें..
खेडू खेतर खेड़ीअें पिंढजा,
वसी पुसाय, तुं पट मींयड़ा ! … वले वतनतें..
जोतर बधीनें ढगा जुपायें,
पोखेंके डॅ, तुं जस मींयड़ा ! … वले वतनतें..
गोंइयें मैंयेंजा धण अैं सुनां,
धा पाणी तां डिइ विन मींयड़ा ! … वले वतनतें..
छायजो छमकारो गजे गोठगोठ,
बाजरजी मानीतें, मखण गच मींयड़ा ! … वले वतनतें..
धरातें उतरइ “देव” हेली हरखजी,
तुं खणी आवें आनंध वस मींयड़ा ! … वले वतनतें..
: वेरसीं मातंग “देव”

मुधेंजी ग़ाल

Jul 9th, 2013
by Jay जय.
1 comment
अईं मातृभासा छडेजो चॉयॉता !
ग़ाल तां मुधेजी आय !
अइं मा जो धावण छडायॉ ता !
ग़ाल तां मुधेजी आय !

माजी कुखमें वा तॅर तां,
मा कुछई ते सेज सॉयां ते,
जनमे नूं मॉर , मिलेती निसीभमे “मातृभासा”
हाणें ईनके छडणी वॅ त,
हिकड़ो साव सॅलो रस्तो आय.

माजी कुख मिंजा न, डायरेक्ट टेस्ट ट्यूब मिंजा पॅधा थीजा ,
टेस्ट ट्यूबके कोय “मा” नती वॅ,
टेस्ट ट्यूबके कोय मातृभासा नती वॅ,
टेस्ट ट्यूबके धावण नतो वॅ,
आसाढ नें श्रावण नतो वॅ.

आंके ई सींभाय त
ग़ाल तां मुधेजी आय !

: कवि गुलाब देढिया (कच्छी कविता संग्रह “रांध” मिंजा)

आसाढी ग़ीत

Jun 26th, 2013
by sachin.
No comments yet
મન તૂં મૉભતજો મેડ઼ો ભનાય,
મન તૂં સૉભતજો મેડ઼ો ભનાય.
મૉભતજી રાંધ મેં હીયેંજા હેતનેં,
હીંયેં જે હેત મિંજ માડૂજો વેશ.
માંજરી હિન કુખમેં તૂં મૉભત ગુરાય.
મનતૂં મૉભતજો મેડ઼ો ભનાય……..

સૉભતજી સંગમેં ધિલજા સબંધનેં,
ધિલમેં લગ઼ેં વિઠીયું સૉભત જ્યું સૂઈયૂં,
સુગંધી સુખડ઼જો તૂં અભલખ સજાય.
મનતૂં મૉભતજો મેડ઼ો ભનાય……..

મૉભતજી વાટતા માડૂ વટાંણુંનેં,
હીંયેંમેં આષાઢી ઉમંગ રચાણું.
ધબકંધે ધિલ કે તૂં ધિલસેં મિલાય.
મનતૂં મૉભતજો મેડ઼ો ભનાય……..

: ગૌતમ જોશી (ઈનીજે પ્રકાશન “નિમોરીયું” મિંજા સાભાર)
Reference : http://drrameshbhattrasmikbnn.wordpress.com

तेज वाणी !

May 16th, 2013
by sachin.
2 comments
: कवि तेजपाल धारसीं नागडा “तेज”

डेसी बावर कच्छजो

Apr 25th, 2013
by sachin.
No comments yet
सीम सेड़े बावरीयो उभो,
कंढेधार बावरीयो उभो,
रजोटी जॅड़े पीरें फूलड़े,
खबरदार बावरीयो उभो !
बकरी नेढू पन चलरेंती,
कीड़ी माकुड़ीअें ह़ार हलेंती,
गूंध जिवे प्यो घाटो थुड़में,
घटाधार बावरीयो ऊभो ! .. सीम…
सोटीयुं ईनज्युं लम्युं लम्युं,
डनणला ई गमयुं गमयु,
गरीभ गुरबें बायणला कर,
वफादार बावरीयो ऊभो ! ..सीम…
कितक तराजी पार उभो ,
कितक गस, गडावट ऊभो,
वाडी भगीचें मों न विजे,
चॉकीधार बावरीयो ऊभो ! ..सीम…
मों पची पोंधे पन चबीजा ,
सेड़े कंढारी वाड़ राखीजा,
बावर खासो त मिंजा वासो,
कच्छ आधार बावरीयो ऊभो
: आईदान खीमकरण गढवी “देवी पुत्र”

મજા આય ઈનમેં !

Apr 1st, 2013
by Jay जय.
2 comments
ગઝલ
*****
ધરધ કે લિકાઈયું, મજા આય ઈનમેં
ખુસી કે વિરાઇઉ , મજા આય ઈનમેં

ન વે ગાલ નામે, છતાં ભીડ થિઈ પે
ઉતા જટ સિરાઇઉ, મજા આય ઇનમેં

રુને સે ન ધૂચે, અંધારા હીયે જા
ડીએ કે જગાઇઉ, મજા આય ઇનમેં

કુછો પા નતા સે, કુછેતી હી સૂરત
છડે ડે વડાઇઉ, મજા આંય ઇનમેં

હઝારે પુન્જે સે, અમી હી જુડેતો
કચ્છી મેં કુછાઇઉ, મજા આય ઇનમેં

બંધ -લગાગા લગાગા લગાગા લગાગા.

: જયેશ ભાનુશાલી “જયુ”

नानाणें जो गाम

Feb 15th, 2013
by sachin.
2 comments
केर हलूंता पां फरादी
नानीमा जो वाण फरादी
ऊ लिज्जत मिठांस किडां अइं ?
भांढु हिकडे भाण फरादी.
कंडील जे जांके ऊजारे
रात सजीजी रेयाण फरादी.
मेडी ते मेडावा मेडा
मोभतजी त खाण फरादी.
संभरें ऊ डीं सॉणें जेडा ,
मनगमधो रहेठाण फरादी.
धूडमिटी ते पघरा पगला
हाणे थ्या मॅमाण फरादी.
धिल धूपेडो बॉके तो , ने
समरण जो लोभाण फरादी.
: दक्षा संघवी

टीपो

Jan 14th, 2013
by Jay जय.
No comments yet
कॅरक वॅलो , कॅरक छॅलो,
कॅरक मॅलो, कॅरक धूचॅलो,
कॅरक धुरीयो, कॅरक नाय,
कॅरक ऊनी वाय ,
कॅरक मानसरोवर,
कॅरक हल्यो हरोहर,
कॅरक मॅरामण में,
कॅरक मांक रिण में.
कॅरक घा तें विठो,
कॅरक ध्रोड़ंधो जरणुं डिठो.
कॅरक ऊछर्यो,
कॅरक पथर्यो,
कॅरक वर्यो , नें तारे नें तर्यो,
कॅरक सिरी व्यो,
खुबो भलें नं हो भर्यो,
कित कितरा पंध,
वडरजी साधर,
कॅरक सुतो, भनीनें चाधर,
हिकड़ो टीपो पाणी,
टीपो पिंढ वडी आखाणी
: कवि गुलाब देढीया

अखर …

Jan 1st, 2013
by Jay जय.
No comments yet
अखर नं जांणां अेकड़ो, नें बुली नं जांणां बिई
मा सरस्वती स्हाय थ्या, त जिभान खुली विई
: कवि वाछीया चंदे
← Earlier Posts
Newer Posts →