Posts under ‘Kutchi Kavita,Chovak,Sahitya (Poetry, Quotes, Literature)’

धींगा संभरे धण धोंरीजा,भलप तां छल भचे,
गोईयें मईयेंजा खीर मिठडा, माडुडा पी मचें. असां के …

होला, पारेला, कबरूं ,कागडा,कोयलडियुं जित कूछें,
शोभतां सुरखाब मुल्लकजी, मोर कळायल नचें. असां के…

वड पीपरी ने जार आमरी, नमुरियें निम लचें,
मिठडो मेवो मुल्लकजो, जित पीरू लाल पचें. असां के…

लुखुं लगें जित मींयडा मोंघा, धोम आकरा धुखें,
वा वंटोळा चडें आकाशें उत्तरजा साय अचें. असां के …

जण जोरूका पट बरूका, बोली बाबाणी रुचे,
भेनरुं, भावर,हेत भरेला,जीगर असां के जचें. असां के  …

पार पुजी को हाल पुच्छे,जिंय नीरधारां मच्छ लुछें,
मावो चय मीठी तवार तनमें, मातृभूमिजी मचे.  असां के…

તડેં દુર્યોધન ચેં હિન મેં મિડેજ રાજા ખોટા અઇં તેં પુઠીયા યુધિસ્થિર ચ્યોં કોય રાજા મુંકે ખોટો નતો લગે. જિતરી જેં મેં સચાઇ સે ખાસા ગુણ ન્યારે ને જેંમેં અવગુણ ઘણે હુવેં સે અવગુણ ન્યારે ‘જૅડી જેંજી નજર’ કેંકે મિડે ખાસા લગેં કેંકે મિડે ભુછડા. ઇન મથા હી ચોવક પઈ જૅડી જેંજી નજર.

तडें दुर्योधन चें हिन में मिडेजा राजा खोटा अंइ तें पुठीया युधिस्थिर च्यों कोय राजा मुंके खोटो नतो लगे.जितरी जें में सचाई से खासा गुण न्यारे ने जें में अवगुण घणे हुवें से अवगुण न्यारे ‘जॅडी जेंजी नजर’ केंके मडे खासा लगें केंके मिडे भुछडा. इन मथा ही चोवक पई जॅडी जेंजी नजर.

सोख हूंधे न समजे कीं,
डोखमें ज सिखें रुंधे तूं.

कख तोडी़ ने के ब टोकर,
सिखें परबारो खेंधे तूं.

सत समागम न के कडें,
सिखें न पगला छूंधे तूं .

डिंधल डिने भिसियाल “बिहारी” ,
सिखे न हथ वारींधे तूं .

सगा हजारुं, सगाईयुं लख, गडजी गजें करोडुं,
लुछें विठयुं प कुछें न लिखपण ! भॉरप जो नां भॅणूं !

भांऐं भांऐं के भेरो के ला भुछड़युं थींन्युं भेणूं,
जिगर विगर की जडी़ सगॅ को ? रत जयुं डिई डिई रॅणूं !

जिरकलडी़ के जांपलीऐनुं जचॅ न बारा विनणूं,
पखा छडी परडेस विने त्युं तांय कुरेला , भॅणूं !

समजू च्यां, संभारी रखजा, सूंवालीयुं अईं भॅणूं,
धूऐ विगर पण धुखणुं कीं से, क्यांनुं सिखंधो छॅणूं !

कितरीयुं कसल्युं, कितरीयुं पसल्युं, कितरो गिनणूं डीणूं,
सुतर राखड़युं, उंतर लागणयुं, लसॅ भला कीं लॅणूं ? !