Kutchi Maadu Rotating Header Image

Posts under ‘Kutchi Kavita,Chovak,Sahitya (Poetry, Quotes, Literature)’

કચ્છી ગીત : કોધરતજી પાયલ

Apr 18th, 2010
by Jay जय.
No comments yet
છનન છમકાર છમકે તી અરે ! કોધરત સંધી પાયલ !
અસાંજે ધિલકે ઈ પલમેં કરે ગમખ્વાર ને ઘાયલ
મિઠા મીં અજ વઠા મેંભૂભ જેડા મોભતી જગમેં
હવાજી લેહરમેં લેરે નીલુડો મખમલી છાયલ !
– છનન ….
ગુલાભી ગુલ ખિલી સામેં અચે ગુલશન મિંજા સૂંણા
સનમ જે ચહેરેજી સુરખી ભની મલકેં મિડે કૂંણા,
હિતે શબનમ ભની બુંધ બુંધ શોભે હાર વિખરાયલ !
– છનન ….
ખોશી જંગલ જ્ભલ ભારી , કણોકણ છાઈ ખોશહાલી
પંખી કલશોર તા કરીએં જગા અજ નાંએ કોં ખાલી
મિઠી મોભતમેં થઇ મામુર ટહુંકે મસ્ત કારાયલ !
– છનન ….
જુકો ધિલ મેં ચગઈ રંગત , સે અજ આંસમાનમેં ડસજે
ભરમ એડા ડઠા પ્રીતમ ! ખોલાસો કો નતો સમજે ,
ડિઠયું ચોફેર મું ધિલભર જ્યું અખિયું મસ્ત શરમાયલ
: પ્રીતમ જોશી
કોધરત સંધી : કોધરત જી , સૂંણા : સૂંહાણા , જ્ભલ : ડુંગર , મામુર : ચકચૂર

नाखुवा : कच्छी कविता

Mar 29th, 2010
by sachin.
1 comment
नाखुवा , होडी़ हाकार ! नाखुवा ,
नाखुवा , होडी़ हाकार !
विञणुं सामे पार ! नाखुवा,
नाखुवा , होडी़ हाकार ! …
वा तूफानी वंइये ता सामे , लह्ररयुं डुंगर धार !
विज वराका, वडर गज्जें, मिंय प मुसलधार
कंधी का आर न पार ! नाखुवा ,
नाखुवा , होडी़ हाकार ! …
नॉलो मुसाफिर अइयें तुं भी, नॉली धरियावाट !
आय पुराणी तोजी होडी़ , पूरी नांय आलाघ !
हथ तॉजा पतवार ! नाखुवा ,
नाखुवा , होडी़ हाकार !
सिक ज सच्ची आय मन में , महभूभ मिलण मनठार !
हेंमथ हिंयें में रक्खी ने तुं , होडी़ तुंहीं जी हाकार !
मौला थींधो मधधगार ! नाखुवा,
नाखुवा , होडी़ हाकार !
: माधव जोशी “अश्क”

माडी तोझी मानी : कच्छी गीत

Feb 27th, 2010
by Jay जय.
3 comments
मिणियां मूंके मिठी लगेती माडी तोझी मानी
माडी तोझी मानी में तां जोबन जोम जुवानी ….. मिणियां
धींगी कच्छडेजी धरती, धींगी बाजरजी मानी
धींगा तोजा हथडा माडी , धींगो कच्छी पाणी …… मिणियां
मेमाणें के मेमानीमें मान ज डींधल मानी
देवेंके पण दुरलभ एडो दान ज तोजो दानी …… मिणियां
माडी तोजे हथजी मानी , मुंजी इज कमाणी,
‘काराणी’ चे अमरत जेडी, मिठडी माजी मानी …… मिणियां
: कवी दुलेराय काराणी

मुंझी मातृभुमि के नमन!

Feb 21st, 2010
by Jay जय.
15 comments
munjimatrubhoomi
Aay Valo Asanjo Vatan, Munji Matrubhoomi ke Naman………..!!!!!!!!!!!!!!

तान में ने तान में !

Feb 13th, 2010
by sachin.
2 comments
महेफिल मे रंगत विइ वघी , इं तान में ने तान में !
ने रात व्यामी विइ सजी , इं तान में ने तान में !
इं तां घाँली वाटींधे भी, यार ! केंके ती अचे ;
व्यासीं खटी ही रांघ अजजी, तान में ने तान में !
यारें जी संगत जो चडी़ व्यो , अइं पोछाँ म ऐडो कैफ;
हेकला मस्ती में झुमों , तान में ने तान में !
केर हुवासीं ? कीं मिल्यासीं ? प्यार माण्यो कीं असीं ?
रिइ न सुघ कीं भी असांके , तान में ने तान में !
पंध ओखो हो भलें ने , डिस प न्यारइ न कडें ;
‘ अश्क ‘ मन्झील ते पुगासीं, तान में ने तान में !
: माधव जोशी “अश्क”

हकल : कच्छी बाल गीत

Feb 4th, 2010
by Jay जय.
3 comments
हकल
हिकड़ों , बो , त्रे , चार
हैया नकरो घरनुं बार.
पंज , छ , सत , अठ,
भेरी खण झा हथ में लठ.
अठ , पोठिया अइं गणझा नों ,
साथ डिने झा खणझा सों,
झेडा़ नों अइं तेडा़ डो,
भडवीरें के केडो़ भो.
डो-वी कइंधे थींधा सो,
इगिया इगिया हलँधा रो !
: कवि डो वसंतजी नागडा

कच्छ वतन

Jan 31st, 2010
by Jay जय.
No comments yet
वल्ला वतन कच्छ ! असीं , सदा विठा सारीयूं
पल न विसारीयूं ! पल न विसारीयूं !
कारो धोरो नीलवो , घिणोधर निनामुं
झारो डुंगर धार्यों असीं, सदा विठा सारीयूं !
निंधों, वडो रिण नेरयुं, निंढा वडा वेटा उ;
धारिया ज्यूँ लरयुं ! असीं, सदा विठा सारीयूं !
गोंयुं मेंयुं रिढ़ पॉयुं उठियुं भटारीयुं;
खीर नित विलोड़यों असीं, सदा विठा सारीयूं !
रापार भचाउ मडई मुनरो अंजार न्यारः
भोज ज्यूँ भाजारयुं असीं, सदा विठा सारीयूं !
काफ़यूं गीत रास रंग , पावा सोणायुं चंग;
सांई के संभार्यों असीं, सदा विठा सारीयूं !
पेरुं बेर लीयार लर, खारक मेवा बावर खर;
गुवार मुड बाजरीयुं असीं, सदा विठा सारीयूं !
मोरला मलारियें नित कुंजड़युं कुणकारियें ;
सेंण ! आँकें सार्यों असीं, सदा विठा सारीयूं !
सुरा संत सांयर पीर , डातार जन्में जते;
सतीयूं पघमणीयुं असीं, सदा विठा सारीयूं !
मालक जी छल थिए मेर, विछड़या मलें थिए खेर ;
बेडयुं कच्छ हाकार्यों असीं, सदा विठा सारीयूं !
: माधव जोशी “अश्क”

कच्छी बोली बोल मेठा !

Jan 30th, 2010
by Jay जय.
1 comment
कच्छी बोली बोल
मेठा ! तूँ कच्छी बोली बोल !
कच्छी बोली बोल
तूँ  धिलझी अच्छी बोली बोल !
मेठा ! तूँ …..
कच्छी बोलो  
कच्छी लक्खों
कच्छी वांचयों
कच्छी सक्खों !
: माधव जोशी “अश्क”

किस्मत रेखा : बाल काव्य

Jan 23rd, 2010
by Jay जय.
1 comment
किस्मत रेखा
बाल काव्य
-*-
चितर चितरीयां !
रत्ता पीरा , कारा नीला
गुल्ल गुलाबी , चितर चितरीयां!

सिज ने चंधर , तारा मंढल !
वसंधल मेघ मलार चितरीयां !

कुकड़ कागड़ो, हंस कबुतर,
तितर कलायल मोर चितरीयां !

हाथी घोड़ो , उठ गांय ने ,
रिढ़ ने बकरी , मे चितरीयां !

हिकड़े निनढड़े हथ जे विचमें ,
किस्मतजी आऊं , रेखा चितरीयां !

: माधव जोशी “अश्क”

ખિલો જિંધગી

Jan 22nd, 2010
by Jay जय.
No comments yet
ખિલો , જિંધગી આય ખિલે લા !
મિલો , જિંધગી આય મિલે લા !!
ડિસો ઉગોણી ડિસમેં નિત નિત , ઉગે વીઠો નઉં સીજ હી કેં લા ?
કૂંઢા કઢીને મિટી મિંજાનું ,બાર અચે તો બિજ હી કેં લા ? !
કચડ્યું કચડ્યું કલીયું ચેં ત્યું
ફૂલો જિંધગી આય ફૂલે લા.    ખિલો…..
છમ – છમ કઈંધા છંઢા નેર્યો છણી ભનેં તા પાલર પાણી ,
લેરૂં ડિંધા વુડંધા રેં તા , લેરેં જી કે લા કઈ લાણી ,
નચંધી નચંધી આવ અચે તી
લાવ લાવ થિઈ તરા છીલે લા ! ખિલો…..
ધરધ કિતે , ધિલધારી કિત કિત, ધુઆ કિતે કિત આય ધવા ,
કેડેં કલમ નેં કેડેં ઇલમ સેં કવિ લિખે તો ગીત નવા ,
હરેં હરેં અય !! ધિલ જ્યું બારીયું
ખુલો જિંધગી આય ખુલે લા !! ખિલો…..
: કવિ ડો. વસંતજી નાગડા
સિજ: સુરજ , કુંધા: અંકુર , લાણી : વાંટણી (ગીફ્ટ) , લાવ લાવ : ભરપુર
← Earlier Posts
Newer Posts →