त्रे बाजु खारो धरीया ने,
हॅकडी बाजु खारो पट ;
तेंजे विचमें मॅठो विरडो,
ई असांजो कच्छ….
मॅठो असांजो कच्छ,
ने मॅठा कच्छी माडु;
जेते बोलाजे कच्छी बोली ,
ई असांजो कच्छ. . . .
भाईचारो असांजो बेमिसाल,
जेंजो नांय जगमें जोटो ;
संत, शुरे ने डातारेमें छॅलके ती कच्छीयत,
ई असांजो कच्छ. . . .
कोरो पां फक्त मुंबई जी तकलादी ने जीवलेण भौतिक सोख समृद्धि मे फसेला रॉबो . लखेंजा ने हणें करोडेंजा वन बेड, टु बेड के थ्री बेड होल किचन जे सांकडे फ्लेट ला, कच्छजे वडे….डेली वारे आंगण , ओसरी, करइ वारे घरें के भोली वॅबो .
विशाळ जमीनें के पारकें जे हवाले करेने कच्छ जी भूमि के,पांजी मातृभूमि के पां भोली वॅबो ?
कच्छ साथेजो पांजो सबंध कोरो फक्त दहेरासर जी धजा, वर्षगांठ, पयुर्षण के माताजी जी पॅडी पूरतो ज रखबो ?
मुंबई जी गर्दी मे गुंगळाइ ने मरे पॅला ही विचारेजो जरुरी आय……
जय कच्छ !
