Kutchi Maadu

हरिहर

आँउ चाँउ :रांध फिटूस

आँउ: ’भा चाँउ, हि पांजी कच्छी भासा आय बोरी मुडसाईवारी भला’.
चाँउ: ’से त आय प तोके अञ किं खबर पिई’?
आँउ: ’यार, ईं चें त मिडे ता पण सच्ची खबर त अञ पिई’.
चाँउ: ’यार, गारा म चब मंढीने गाल कर’.
आँउ: ’एडो थियो क अञ आँउ मेळावे लाय अचिंधो हो सें तडें हिकडो माडु ओछतो रस्ते विच्च्में छणीने प्यो ने मरी व्यो’.
चाँउ: ’अडे, तो अईंए ज एडो ’भोराळो’ के जेडां विञें तेडांनु मोकाणजा समाचार खणी अचें तो.
पोय कुरो थ्यो? मुडधेके मसाणमें पोजायां क न’?
आँउ: ’न भा, तेस तईं त हिकडा बापा आया ने च्यों क धुनियामें केडा केडा ’विसध्ध’ माडु प्या
अईं.जीवधे त नतो आवडे प मरणुं केडां ईए खबर नती पे. भर रस्तेजे विच्चमें प्या मरें’.
चाँउ: ’पोय’?
आँउ: ’पोय बापाजो दखाडो सुणीने मुड्धो त धिरजीने उभो थ्यो ने चें, बापा माफ कजा भला, भुल थिई वई बापा, ईं चईने मुडधो उथीने बई बाजु रस्ते नीचे विञीं ने सुमी रयो’.

हरि बोल

आँउ चाँउ : हडताल मारें विधें

चाँउ: ’को भा आँउ अञ तोजी हिकडी भाझार भंध आय? अखते ही केडो कारो दाबलो बधे आय’?
आँउ: ’ही मिडे बेंकवारेजा ’दो’ अईं’.
चाँउ: ’को तो बेंकवारेसें मारामारी के’?
आँउ: ’न न, गाल एडी नाय प ईन पुठीयाँ वडी ”अंधरजी आखाणी’’ थिई विई’.
चाँउ: ’त भले सुणाय तोजे ध्ररधजी आखाणी’.
आँउ: ’यार आँउ दाकतर वटें मोतीएजो ’उपरेश’ करायला व्यओ हो सें’.
चाँउ: ’अडे तुं केडो ढंगधडे विगरजो माडु अईंएं. ईन गालमें विचाडो दाकतर केडां आयो’?
आँउ: ’या पूरी गाल त करे लाय दे. तुं तकडो बोरो भला’.
चाँउ: ’भले चो वेलो’.
आँउ: ’दाकतर चें ५०००/- थींधा. से आँउ कभूल क्या. त साहेब च्यों रोकडा दे. प आँउ त कितरा थिंधा ई खबर न हुई एतरे चेक खणी व्यो हो सें. से साहेबके दिनुं. पण साहेब
चें क चेक पास थिये पोय उपरेशन करींधोसें. चेक रखी विञ, २ दिं पोय अचीज. तेस
तईं तोजो चेक पाचो न आयो त पास थिई व्यो ईं समजी तोजो उपरेशन कंधासीं.
हाणे २ दि पोय आँउ उपरेशन ला व्योसें.

सहेब मुंके बांकडेते सुमारे ने मोंते ढक बधीने मिशीन मिशिन लगायों.
पंज दो मिलिटमें त मिडे पती व्यो. साहेब नईं अख लगाए दिनो.
ने साहेब मिडे समजायों विठे क ही ही धवा लगायजी, मेंणुं दिं न नायजो अखते
पाणी न पे से ध्यान रखेजो’.

आउँचाँउ-हाणे त हध थियेती.
आँउ: ’भा चाँउँ, यार हाणे त हध थिएती भला’.
चाँउँ: ’को वरी कुरो थ्यो’?
आँउ: ’यार पाँ उन दिं काग मथे गाल्युं कंधा हुआसीं न से मुँके लगेतो ’कच्छी माडु’वारा सुणी व्या ने पिंढजी साईटते ’काग’ वाणीजे नाले छापे छद्यों. ई त हध थई वई भला’.
चाँउँ: ’चेंता भीतीएंके प कन हुएं ता’.
आँउ: ’हा ई गाल त सच्ची प हेडां त वडजो ओटो आय भीत्युँ केडां अईं? मुँके लगेतो ई म़डे कागडेजा कम अईं. विञींने पियुष के चई आयो. कागडो केंके चोवाजे’?
चाँउँ: ’हा पण तेंजो कुरो? तुं कुलाय एतरो हूशरो करीएंतो’?
आँउ: मुंके लगेतो काग वाणी जो ई लेख दिग्विजयसिंह वांचेने कागवारे विनोद रायते हुमलो क्यों, एडा समाचार अञ झी टी.वी. ते सुआ. यार विनोद राय गमे एडो माडु हुए, लोकशाईमें एडी मारकुट केंणी दिग्विजयसिंह जेडे दिग्गज माडुके शोभे नती’.