Kutchi Maadu Rotating Header Image

नीस्वारथ

नीस्वारथ
मधध कर्यो…
फायधे विगर

हिलो मिलो…
मतलभ विगर

जींधगी जीयो…
डेखाडे विगर

सेवा कर्यो…
मेवे जी आसा विगर

करम कर्यो…
फड઼ जी आसा विगर

रॅयाण कर्यो…
धिल के भंध के विगर
: वसंत मारू…चीआसर
નીસ્વારથ
મધધ કર્યો…
ફાયધે વિગર

હિલો મિલો…
મતલભ વિગર

જીંધગી જીયો…
ડેખાડે઼ વિગર

સેવા કર્યો…
મેવે જી આસા વિગર

કરમ કર્યો…
ફડ઼ જી આસા વિગર

રૅયાણ કર્યો…
ધિલ કે ભંધ કે વિગર
– વસંત મારૂ…ચીઆસર

मोजसें हलूतां

मोजसें हलूतां
———–
मोजसें जीयूतां, ने मोजसें मिलूतां
मोजमें फिरुंतां,ने मोजसें हलूतां

न चिंधा रखूंतां, न चिंधा कडॅ खणूंतां
वेड઼ाके मान डियूंतां,ने मोजसें हलूतां

आसाउ प वडीउं, ऊथीने जगाईए
छडी पग भर्यूता,ने मोजसें हलूतां

नता पू कडॅ प लेखे जोखेजे पांपणें
थेओ ई नॅरीयूंतां,ने मोजसें हलूतां

नेईयूं वसधे मीं छले, कंधे कांत धोड઼े
असीं सडा छलूतां,ने मोजसें हलूतां

कांत ~ तुंबडी

મોજસેં હલૂતાં
————

મોજસેં જીયૂતાં, ને મોજસેં મિલૂતાં
મોજમેં ફિરુંતાં,ને મોજસેં હલૂતાં

ન ચિંધા રખૂંતાં, ન ચિંધા કડૅ ખણૂંતાં
વેડ઼ાકે માન ડિયૂંતાં,ને મોજસેં હલૂતાં

આસાઉ પ વડીઉં, ઊથીને જગાઈએ
છડી પગ ભર્યૂતા,ને મોજસેં હલૂતાં

નતા પૂ કડૅ પ લેખે જોખેજે પાંપણેં
થેઓ ઈ નૅરીયૂંતાં,ને મોજસેં હલૂતાં

નેઈયૂં વસધે મીં છલે, કંધે કાંત ધોડ઼ે
અસીં સડા છલૂતાં,ને મોજસેં હલૂતાં

કાંત ~ તુંબડી

साल मुबारक ! सुभ डियारी ! मिणींके डियारी जी हार्दिक सुभेच्छाउं

राष्ट्रीय घरवारी डीं

🌷. राष्ट्रीय घरवारी डीं 🌷
…………………………….
भलॅ चाल हलॅ उ अवरी सवरी
प गाल हूए इनजी वटवारी

सिज઼ नुं मॉर उपटे घर जी बारी
जापट- जुपट कै,खणॅ उ बुआरी

लुगडा- लबाचा ,ठामणा विछरी
हकल अचॅ,हलो तयार सीराणी

सांवरे अचॅ पॅला भलॅ वॅ कुंवारी
खणॅ अचॅती संस्कार जी खुमारी

ज..हिकडो डीं , घर में न वॅ नारी
ही विचार सॅ.. ज विञंधा हरૉरी

घर हलायला , मिलॅ ओछी कोरी
ब्या कम पण बूजें,हूए उ हुनरी

गुड जॅडी मिठी ने सकर जॅडी सीरी
रोज सलाम भरणी खपॅ घरवारी के….🥰

हिनाभेदा….. ‘हिना’

मास्तर डीं जीयुं वधाईंयूं

मास्तर
घरथी जुंढा थिई विनणूं पॅ नीसाड़
वाल वसांया वला असांजा मास्तर

एकडे एकथी बाराखडीजी जातर
ई सिखांया वला असांजा मास्तर

रमंधे भणंधेने वध्या असीं इगीया
पकल करांया वला असांजा मास्तर

संस्कृती ने सन्मानजी वाटतें हलेला
डिस वतांया वला असांजा मास्तर

इनीवट सिखी कईक अभके छूंएता
वडा भनांया वला असांजा मास्तर

न भुलज वसंत इनीजा ही उपकार
हींयू छिलांया वला असांजा मास्तर
– वसंत मारू… चीआसर
———————————————
🙏 मास्तर डीं जीयुं वधाईंयूं 🙏

आवई आषाढी बीज – कच्छी साहित्य मंडळ (भोज) आयोजित कवि संमेलन Aashadhi Bij (Kavi sammelan)

वाजिया घिउं

वाजिया घिउं
———————-

बाई मानी घडींधी वी वाजियॅ घिउंजी
ने, मिठास भिरधीं वी वाजियॅ घिउंजी

सीरोॅ, लपई, गोडपापडी लडूला डारा
बुसकार अचींधी वी वाजियॅ घिउंजी

घणें बाचका भरया हूंधा वा हटतें
चकीते पीसाई थींधी वी वाजियॅ धिउंजी

जुवार, बाजर, रतड, रता वाजिया
खाणपीणी हूंधी वी वाजियॅ घिउंजी

‘केतु’,डॅसी गुड,घॅ भॅरी भनें मिठाइयूं
बरूंकाई डिसांधी वी वाजियॅ घिउंजी.

केतना छेडा ‘केतु’

लियार जी

लियार जी🍒 लियारसे लेचॅली डाळ,*
*ने भतार 🍱भेगी डुंगरी जी पाळ,🧅*
*माटीजी थधी मखण वारी छाय,*
*डॅसी हॅनिके मठी भोख लगी आय.*
*तराजी पार मथा….थधो वा वेठो वाय,*
*माडी जे हथजी मानी निरांते खाय,*
*नॅमजी🌳 छाई में लाट नॅधंरजा😴 झोकां खाय,*
*उठी ने पोय खीर वारी खपॅ कडक चाय.☕*
*समये संभरे हि डीं अना भोलाणुं नाय,*
*नर चे हॅडी गामडेजी मझा शेर मॅ नाय.*

मनमें भरी

*तान्का*
मनमें भरी
हलनेंप्यो त मिडे
ई जॅर आय
सोणी नें कढी विजे
त लीलालॅर आय
– वसंत मारू… चीआसर

जुको पारखू आय

जॅंके कीं परख नांय
इनजे वखाण थी
संभारी नें हलज
जुको पारखू आय
इनजे मोन थी तूं
वसंत धिरजी हलज
– वसंत मारू… चीआसर